Watu 10 wafanyiwa upasuaji wa moyo kutumia tundu dogo (Minimum Invasive Surgery) katika kambi maalum ya matibabu iliyofanyika Taasisi ya Moyo Jakaya Kikwete

Wataalam wa Taasisi ya Moyo Jakaya Kikwete (JKCI) kwa kushirikiana na mwenzao kutoka Hospitali ya Max iliyopo nchini India Dkt. Viveka Kumar wakimfanyia mtoto upasuaji wa kumbadilishia betri ya moyo iliyoisha muda wake kwa kutumia tundu dogo (Minimum Invasive Surgery) katika kambi maalum ya siku nne iliyomalizika leo katika Taasisi hiyo Jijini Dar es Salaam. Jumla ya wagonjwa 10 wenye matatizo ya hitilafu ya mfumo wa moyo na wale ambao mioyo yao imeshindwa kufanya kazi (Heart failure) wamefanyiwa upasuaji mdogo wa moyo katika kambi hiyo.

Wataalam wa Taasisi ya Moyo Jakaya Kikwete (JKCI) Kwa kushirikiana na mwenzao kutoka Hospitali ya Max iliyopo nchini India Dkt. Viveka Kumar wakiusoma mfumo wa umeme wa moyo wa mgonjwa ambaye ana hitilafu ya mfumo wa umeme wa moyo wakati wa upasuaji mdogo wa moyo kwa kutumia tundu dogo (Minimum Invasive Surgery) katika kambi maalum ya siku nne iliyomalizika leo katika Taasisi hiyo Jijini Dar es Salaam.

Na: JKCI

****************************************************************************************************

Wagonjwa 6 wenye hitilafu ya mfumo wa umeme wa moyo na wagonjwa wanne ambao mioyo yao imeshindwa kufanya kazi (Heart failure) wamefanyiwa upasuaji mdogo wa moyo kwa kutumia tundu dogo (Minimum Invasive Surgery) katika kambi maalum ya matibabu ya siku nne iliyofanywa na madaktari wa Taasisi ya Moyo Jakaya Kikwete (JKCI) kwa kushirikiana na wenzao kutoka Hospitali ya Max iliyopo nchini India.

Akizungumzia kambi hiyo Daktari bingwa wa magonjwa ya moyo na mfumo wa umeme wa moyo wa JKCI Yona Gandye amesema kuwa lengo kubwa la kambi hiyo ni kubadilishana uzoefu na kutoa elimu kwa madaktari ambao wapo masomoni hivo kuendeleza gurudumu la kuzalisha madaktari bingwa wa magonjwa ya moyo.

“Tumekuwa tukishirikiana na madaktari kutoka maeneo mbalimbali hivyo kutusaidia kuwa na mahusiano mazuri na hospitali nyingi duniani, lakini pia kutoa fursa kwa hospitali hizo kuruhusu wataalam wetu kwenda kujifunza kwao na kuzalisha madaktari wabobezi wengi zaidi”, alisema Dkt. Gandye

Dkt. Gandye amesema kuwa katika kambi hiyo wameweza kuwapatia matibabu wagonjwa wenye hitilafu ya mfumo wa umeme wa moyo na wagonjwa ambao mioyo yao imeshindwa kufanya kazi (heart failure) ambao walihitaji matibabu ya kina.

“Dalili za wagonjwa wenye hitilafu ya mfumo wa umeme wa moyo ni pamoja na mapigo ya mioyo yao kwenda haraka sana, na wakati mwingine kupoteza fahamua. Tunapojiridhisha kuwa wagonjwa wana hitilafu ya mfumo wa umeme wa moyo uangalia ni aina gani ya matibabu inawafaa kwa wakati huo, kwani wapo tunaowaanzishia dawa na kuangalia muenendo wa mfumo wa umeme wa moyo na wengine uhitaji upasuaji mdogo wa moyo kurekebisha ile sehemu inayozalisha mapigo ya umeme yanayoleta athari kwa mgonjwa”, alisema Dkt. Gandye

Aidha Dkt. Gandye amesema kuwa katika kambi hiyo pia wameweza kuwatibu wagonjwa ambao mioyo yao imeshindwa kufanya kazi (heart failure) ambao mara nyingi wagonjwa hao mioyo yao hutanuka hivyo kupelekea hitilafu ya mfumo wa umeme wa moyo yaani pande zote mbili za moyo kushindwa kufanya kazi kwa kushirikiana.

“Katika matibabu ya wagonjwa ambao mioyo yao imeshindwa kufanya kazi (heart failure) tunarekebisha mfumo wa umeme wa moyo ambao una hitilafu kiasi kwamba mgawanyo wa umeme upande wa kushoto na kulia utokea kwa wakati mmoja hivyo kuuwezesha moyo kusukuma damu pande zote za kushoto na kulia kwa wakati mmoja”,

“Wagonjwa ambao mioyo yao imeshindwa kufanya kazi vizuri mara nyingi hupata changamoto za pumzi kubana, kuchoka sana na wengine ukutana na changamoto ya kusikia kukabwa wakati wa usiku kutokana na pumzi kubana inayosababishwa na athari iliyopo katika moyo”, alisema Dkt. Gandye

Sambamba na hilo Dkt. Gandye ameishukuru serikali kwa kuwezesha vifaa vya matibabu vilivyopo JKCI, kuweka mazingira rafiki yanayoruhusu wataalam wa afya kutoka sehemu mbalimbali kuingia nchini kwa ajili ya kushirikiana nao katika kutoa huduma za kibingwa za matibabu ya moyo hivyo kupunguza idadi ya wagonjwa wengi waliokuwa wanaenda nje ya nchi kwa ajili ya matibabu ya moyo

“Wito wangu kwa watanzania, wasiwe na mazoea ya kwenda hospitali wanapoumwa tu kwani magonjwa ya moyo yaliyo mengi hadi ifikie hatua unaona dalili tatizo linaweza likawa limeshasababisha uharibufu mkubwa katika moyo, hivyo tuwe wepesi kuchunguza afya na kubaini matatizo mapema ili tuweze kuyadhibiti na kupunguza madhara yanayotokana na magonjwa ya moyo”, alisema Dkt. Gandye

Kwa upande wake Daktari bingwa wa magonjwa ya moyo kutoka Hospitali ya Max iliyopo nchini India Viveka Kumar amesema kuwa madaktari kutoka Hospitali ya Max wamekuwa wakishirikiana na madaktari wa JKCI kutokana na Taasisi hiyo (JKCI) kuwa moja ya vituo vichache katika bara la Afrika inayotoa huduma bora na za kibingwa za magonjwa ya moyo.

“Tunafurahi kuwa sehemu ya taasisi hii, kutokana na huduma za bingingwa zinazotolewa hapa na kuifanya taasisi hii kuwa hospitali ya kibingwa ya magonjwa ya moyo”,

“Ni mara yangu ya kwanza kufika Tanzania na najivunia kuwa hapa, uwepo wangu hapa ni sehemu ya kulipa fadhila kwa watanzania ambao wamekuwa wakarimu kwa ndugu zangu kutoka India ambao waliishi Tanzania”, alisema Dkt. Kumar

Aidha Dkt. Kumar alisema kuwa hapo awali India ilipokea wagonjwa wengi wenye matatizo ya moyo kutoka Tanzania lakini sasa wagonjwa hao wamepungua kutokana na uwepo wa hospitali za kibingwa hapa nchini.

“Sasa naelewa kwanini wagonjwa wa moyo kutoka Tanzania wamepungua nchini India, Taasisi hii ina kila sababu ya kupunguza wagonjwa kwenda india kutibiwa kwani ina vifaa vya kutosha na huduma za kibingwa, huduma za uangalizi maalum ni za kisasa kutokana na mashine zilizopo na madhari ya vyumba vya wagonjwa kuwa nzuri hivyo kuwapunguzia watanzania gharama za kwenda nje ya nchi kutibiwa”, alisema Dkt. Kumar