Idadi ya Wagonjwa wa moyo wanaotibiwa nchini India yapungua

Wataalamu wa Taasisi ya Moyo Jakaya Kikwete (JKCI) kwa kushirikiana na mwenzao kutoka Hospitali ya Max iliyopo nchini India Dkt. Viveka Kumar wakimfanyia upasuaji wa tundu dogo mgonjwa ambaye mfumo wake wa umeme wa moyo una hitilafu katika kambi maalum ya siku tatu iliyomalizika jana katika Taasisi hiyo iliyopo jijini Dar es Salaam. Jumla ya wagonjwa 13 wenye matatizo mbalimbali ya moyo wametibiwa katika kambi hiyo

Picha na Khamis Mussa

*********************************************************************************************************

Idadi ya wagonjwa wa moyo wanaotibiwa nchini India yapungua kutokana na uwepo wa Taasisi ya Moyo Jakaya Kikwete (JKCI) inayotoa matibabu ya kibingwa ya magonjwa hayo.

Hali hiyo imejidhihirisha baada ya Taasisi hiyo kupokea wagonjwa ambao zamani walikuwa wakienda nchini India kwa ajili ya matibabu mbalimbali yakiwemo magonjwa ya moyo.

Akizungumza na waandishi wa habari mgonjwa aliyefanyiwa upasuaji wa moyo katika kambi maalumu ya matibabu ya moyo iliyokuwa ikifanywa na wataalamu wa Taasisi ya Moyo Jakaya Kikwete (JKCI) kwa kushirikiana na mwenzao kutoka Hospitali ya Max iliyopo nchini India Nahida Mohamed alisema aliwahi kusumbuliwa na matatizo ya miguu na kwenda nje ya nchi kwa ajili ya kupatiwa matibabu lakini baada ya kupata matatizo ya moyo familia yake ilimshauri asiende tena nje ya nchi kwani sasa huduma bora za matibabu zinapatikana hapa nchini.

Nahida alisema kutokana na huduma zinazotolewa JKCI wagonjwa wanaoenda nchini India kwa ajili ya matibabu imepungua kwani wataalamu wa JKCI wanawapa matumaini na faraja wagonjwa jambo ambalo hakuliona alivoenda kutibiwa nje ya nchi kwa nyakati tofauti kutokana na matatizo ya miguu aliyokuwa nayo.

“Nimeshuhudia huduma nzuri za matibabu hapa JKCI kwani wagonjwa tunahudumiwa vizuri, wataalam wa afya hapa wanafanya kazi kwa wito, wanapita katika vitanda vyetu kila mara kuulizia kama tunahitaji huduma yoyote sikutegemea kama ningepata huduma nzuri hivi”, alisema Nahida

Akizungumza kuhusu kambi hiyo Daktari bingwa wa magonjwa ya moyo na mfumo wa umeme wa moyo kutoka Taasisi ya Moyo Jakaya Kikwete (JKCI) Yona Gandye alisema katika kambi hiyo wagonjwa 13 wenye matatizo mbalimbali ya moyo wamefanyiwa upasuaji wa tundu dogo kwa kutumia mtambo wa Cathlab.

Wagonjwa hao walikuwa na matatizo ya hitilafu ya mfumo wa umeme wa moyo, matatizo ya moyo kwenda kasi, matatizo ya moyo kuchoka na kushindwa kufanya kazi, na matatizo ya mishipa ya damu kuziba kwa muda wa siku 90 hivyo kufanya upasuaji wake kuwa mgumu.

Dkt. Gandye alisema upande wa wagonjwa wenye hitilafu ya mfumo wa umeme wa moyo walikuwepo wagonjwa ambao mapigo yao yalikuwa yamevurugika (Atrial Fibrillation - AF), wagonjwa ambao husikia mioyo yao ikidunda na ghafla kusikia ukimya hivyo kuhisi mioyo yao imesimama (PVC), na wagonjwa ambao wamezaliwa wakiwa na njia ya ziada ya kutengeneza mapigo ya moyo.

“Wagonjwa ambao wamezaliwa wakiwa na njia ya ziada ya kutengeneza mapigo ya moyo huweza kuwa na tabia mbalimbali kama vile kusababisha moyo kwenda kwa kasi zaidi, ama wengine kutokuwa na dalili yoyote ambayo huweza kusababisha vifo vya ghafla”, alisema Dkt. Gandye

Dkt. Gandye alisema wamekuwa wakifanya kambi maalum za matibabu ya moyo kwa wagonjwa wanaowahudumia kwa pamoja na wataalamu wabobezi kutoka hospitali mbalimbali duniani wakiwa na lengo la kubadilishana ujuzi pamoja na kuwasaidia wagonjwa kupata huduma bora.

Kwa upande wake daktari bingwa wa magonjwa ya moyo kutoka Hospitali ya Max iliyopo nchini India Viveka Kumar alisema hii ni mara yake ya pili kushirikiana na madaktari wa JKCI ambapo anaona mafanikio makubwa yamekuwa yakifanyika upande wa upasuaji mdogo wa moyo kwa kutumia tundu dogo.

Dkt. Viveka alisema wataendelea kuwapa ushirikiano wataalam wa JKCI pale wanaohitaji ujuzi kutoka kwao ili wagonjwa wote wenye matatizo ya moyo waliopo hapa nchini pamoja na nchi za jirani wafike katika Taasisi hiyo kwa ajili ya kupatiwa matibabu kwani taasisi hiyo imewekeza vifaa vya kisasa kwa ajili ya kuwahudumia wagonjwa wa moyo.

“Maono yangu katika siku za hivi karibuni wataalam wa afya wa hapa JKCI watakuwa na uwezo wa kufanya upasuaji wa aina nyingi zaidi kama wazawa kutokana na kasi waliyonayo ya kujifunza wakati tunabadilishana uzoefu”, alisema Dkt. Viveka

Dkt. Viveka alisema kuwa kabla ya Taasisi hiyo kuanzishwa India ilipokea wagonjwa wengi wa moyo kutoka Tanzania lakini baada ya uwekezaji uliofanywa katika Taasisi hiyo na wataalam kubobea katika kutoa matibabu ya kibingwa ya moyo sasa wagonjwa wa moyo hawana haja ya kwenda nchini india kwa ajili ya matibabu ya moyo.