JKCI wafundishwa teknolojia ya kisasa ya kuziba matundu ya moyo

Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge akiwa katika picha ya pamoja na Wataalamu wa afya kutoka Hospitali ya Fuwai iliyopo Beijing China na wengine wa JKCI mara baada ya mafunzo ya jinsi ya kuziba matundu na kuzibua mishipa ya damu ya moyo iliyoziba bila kutumia mashine ya mionzi leo katika taasisi hiyo iliyopo jijini Dar es Salaam.

Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge akizungumza na wataalamu wa afya kutoka Hospitali Fuwai iliyopo Beijing China leo wakati wataalamu hao walipofika JKCI kwaajili ya kubadilishana ujuzi na wenzao wa JKCI katika kutoa huduma za upasuaji mdogo wa moyo bila kutumia mashine ya mionzi kwa watoto wenye magonjwa ya moyo.

Mkurugenzi Mkuu wa Hospitali ya Fuwai iliyopo Beijing China prof. Xiangbin Pan akielezea namna huduma za upasuaji mdogo wa moyo bila kutumia mionzi zinavyoweza kufanyika kirahisi kutokana na maendeleo ya teknolojia wakati wa mafunzo ya jinsi ya kuziba matundu na kuzibua mishipa ya damu ya moyo iliyoziba bila kutumia mashine ya mionzi yaliyokuwa yakitolewa leo kwa wataalamu wa Taasisi ya Moyo Jakaya Kikwete (JKCI) jijini Dar es Salaam.

Mkurugenzi Mkuu wa Hospitali ya Fuwai iliyopo Beijing China Prof. Xiangbin Pan akimpatia zawadi kutoka china Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge baada ya mafunzo ya jinsi ya kuziba matundu na kuzibua mishipa ya damu ya moyo iliyoziba bila kutumia mashine ya mionzi kwa wataalamu wa JKCI leo jijini Dar es Salaam.

Baadhi wa wataalamu wa afya kutoka Hospitali ya Fuwai iliyopo Beijing China na wenzao wa Taasisi ya Moyo Jakaya Kikwete (JKCI) wakisikiliza wakati wa mafunzo ya jinsi ya kuziba matundu na kuzibua mishipa ya damu ya moyo iliyoziba bila kutumia mashine ya mionzi leo katika taasisi hiyo iliyopo jijini Dar es Salaam.

Na: JKCI

*****************************************************************************************************************

Wataalamu wa Taasisi ya Moyo Jakaya Kikwete (JKCI) wamepewa mafunzo ya jinsi ya kuziba matundu na kuzibua mishipa ya damu ya moyo iliyoziba bila ya kufanya upasuaji wa kufungua kifua na bila ya kutumia mashine zenye mionzi.

Upasuaji huo unafanyika kwa njia ya tundu dogo kwa kutumia mashine ya kuangalia jinsi moyo unavyofanya kazi (Echocardiography – ECHO).

Akizungumza kuhusu mafunzo hayo yaliyotolewa leo jijini Dar es Salaam,   Prof. Xiangbin Pan ambaye ni Mkurugenzi Mkuu kutoka hospitali ya Fuwai iliyopo Beijing nchini China alisema hivi sasa teknolojia ya matibabu ya moyo imekuwa na imefikia hatua uwekezaji wake hauhitaji kuwa  na mashine za gharama kubwa katika kufanya upasuaji.

Prof. Pan alisema wagonjwa wengi wa moyo wako vijijini na wanazifuata huduma za matibabu na upasuaji mijini mahali ambako kuna hospitali kubwa zenye wataalamu wabobezi, kufanyika kwa upasuaji huo kunawapunguzia wananchi gharama ya kusafiri na kukaa hospitali muda mrefu.

 “Kuwepo kwa teknolojia hii kumetusaidia kuwatibu kwa urahisi wagonjwa wa moyo kwani tunatoa huduma hii katika hospitali na tunawafuata wagonjwa mahali walipo na kuwafanyia upasuaji ndani ya gari maalumu ambalo ndani yake kuna chumba cha upasuaji pamoja na mashine za ECHO kwaajili ya kufanya upasuaji huo”.

 “Tunatarajia kulileta gari hili maalumu katika Taasisi ya Moyo Jakaya Kikwete (JKCI) kwani ni mradi uliopata ufadhili kupitia Umoja wa Mataifa (UN) ikishirikiana na Wizara ya Afya ya Tanzania, JKCI na hospitali ya Fuwai iliyopo nchini China ninaamini huduma zitakazotolewa katika gari hili maalumu zitasaidia kuokoa maisha ya watanzania wenye matatizo ya moyo hasa waliopo vijijini”, alisema Prof. Pan.

 Kwa upande wake Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge alishukuru kwa mafunzo yaliyotolewa na kusema kuwa kuwepo kwa utaalamu huo kutaokoa maisha ya wagonjwa wengi zaidi na kupunguza gharama za matibabu.

Dkt. Kisenge alisema ushirikiano uliopo kati ya China na Tanzania ni wa muda mrefu na unafaida nyingi moja ya faida iliyopo ni katika sekta ya afya ambapo serikali ya China ilijenga jengo la Taasisi ya Moyo Jakaya Kikwete (JKCI) na kila baada ya miaka miwili madaktari bingwa kutoka nchini humo wanakuja hapa nchini kutoa huduma za matibabu ya kibingwa kwa wananchi.

“Matibabu haya ni ya teknolojia ya hali ya juu na ni rahisi kufanyika kwani hayatumii mionzi ambayo inaweza kusababisha madhara kwa mgonjwa pamoja na mtoa huduma na yanapunguza gharama za matibabu”.

 “Ninawashukuru sana kwa kuja katika taasisi yetu kutoa mafunzo na kufanya kambi maalumu ya matibabu ya moyo kwa watoto, hii siyo mara ya kwanza kwa nyinyi kuja hapa mlishakuja zaidi ya mara tatu mkatoa huduma za matibabu, mkatupatia vifaa tiba na kutoa mafunzo kwa wataalamu wetu”, alishukuru Dkt. Kisenge.

Daktari bingwa wa watoto kutoka Taasisi ya Moyo Jakaya Kikwete (JKCI) Theophylly Ludovick ambaye alipata mafunzo hayo kwa muda wa miezi mitatu katika ya Hospitali ya Fuwai nchini China alisema utaalamu alioupata ni wa hali ya juu na atautumia kutoa huduma bora kwa wagonjwa.

“Nimejifunza jinsi ya kutumia mashine ya ECHO kuziba matundu ya moyo ambayo ni teknolojia ya kisasa, inayomlinda mgonjwa na mtoa huduma kutokupata madhara yatokanayo na mionzi pia mgonjwa anapata huduma ya matibabu kwa gharama naafuu ukilinganisha na njia ya kutumia mionzi”, alisema Dkt. Theophylly.

Dkt. Theophylly alisema teknolojia hiyi ya upasuaji inafanyika kwa watu wazima na watoto wenye matatizo ya tundu kwenye moyo.

Mafunzo hayo yanakwenda sambamba na kambi maalumu ya upasuaji wa moyo  kwa njia ya tundu dogo kwa watoto, ambapo wataalamu wa JKCI na wenzao wa hospitali ya Fuwai watashirikiana kutoa huduma hiyo.