Balozi wa Israel aishauri JKCI kuongeza ujuzi zaidi katika kutoa huduma za kibingwa za matibabu ya moyo

Daktari bingwa wa upasuaji wa moyo na mishipa ya damu kwa watoto wa Taasisi ya Moyo Jakaya Kikwete (JKCI) Godwin Sharau akimuelezea Balozi wa Israel nchini Mhe. Michael Lotem kuhusu huduma za matibabu zinazotolewa kwa watoto wanaotibiwa katika Taasisi hiyo wakati wa ziara yake ya kuangalia huduma zinazotolewa na JKCI jana jijini Dar es Salaam.

Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge akimuonesha maeneo mbalimbali ya Taasisi hiyo Balozi wa Israel nchini Mhe. Michael Lotem wakati wa ziara yake ya kuangalia huduma zinazotolewa na Taasisi hiyo jana jijini Dar es Salaam.

Mwenyekiti wa Bodi ya Wadhamini ya Taasisi ya Moyo Jakaya Kikwete (JKCI) Prof. William Mahalu akielezea namna ambavyo Israel kupitia Shirika la Okoa moyo wa mtoto (Save a child heart – SACH) limeweza kusaidia upatikanaji wa huduma bora za upasuaji wa moyo wakati balozi wa Israel nchini alipotembelea JKCI kwa ajili ya kuangalia huduma zinazotolewa.

Balozi wa Israel nchini Mhe. Michael Lotem akizungumza na viongozi wa  Taasisi ya Moyo Jakaya Kikwete (JKCI) (hawapo pichani) wakati wa ziara yake katika Taasisi hiyoya  kuangalia huduma zinazatolewa

Baadhi ya viongozi wa Taasisi ya Moyo Jakaya Kikwete (JKCI) wakimsikiliza balozi wa Israel nchini Mhe. Michael Lotem wakati wa ziara yake  ya kuangalia huduma zinazotolewa na JKCI jana jijini Dar es Salaam

Mwenyekiti wa Bodi ya Wadhamini ya Taasisi ya Moyo Jakaya Kikwete (JKCI) Prof. William Mahalu akiwa katika picha ya pamoja na Balozi wa Israel nchini Mhe. Michael Lotem na viongozi wa Taasisi hiyo mara baada ya kumalizika kwa ziara ya balozi huyo ya kuangalia huduma zinazotolewa na JKCI jana jijini Dar es Salaam. Wapili kushoto ni Mkurugenzi Mtendaji wa JKCI Dkt. Peter Kisenge.

Na: JKCI

*********************************************************************************************************************

Balozi wa Israel nchini Mhe. Michael Lotem ameishauri Taasisi ya Moyo Jakaya Kikwete (JKCI) kuongeza ujuzi zaidi katika kutoa huduma za kibingwa za upasuaji wa moyo kwa kuwa Taasisi hiyo ni moja kati ya Hospitali chache zinazotoa huduma hiyo barani Afrika.

Rai hiyo ilitolewa jana jijini Dar es Salaam wakati Mhe. Balozi Lotem alipotembelea Taasisi ya Moyo Jakaya Kikwete (JKCI) kwa ajili ya kuangalia huduma zinazotolewa pamoja na kuendeleza ushirikiano uliopo baina ya Israel na Tanzania.

“Taasisi hii imekuwa ikishirikiana na Taasisi ya Okoa moyo wa mtoto (Save a Child’s Heart – SACH) ya nchini Israel kwa muda mrefu lengo likiwa ni kuokoa maisha ya watoto wenye magonjwa ya moyo, ujio wangu hapa ni pamoja na kuangalia huduma wanazozitoa na kuendeleza ushirikiano uliopo”, alisema Mhe. Balozi Lotem.

Balozi Lotem alisema kama JKCI  inatembea, hivi sasa inatakiwa kukimbia kwani huduma za matibabu ya moyo ni za muhimu na kuahidi kuwa nchi ya Israel itaendelea kushirikiana na JKCI kuongeza ujuzi na kuwasaidia watoto wenye magonjwa ya moyo.

“Taasisi hii haitakiwi kufurahia  idadi ya namba za wagonjwa mnaowapatia huduma bali mnatakiwa kufarahia uwepo wa huduma hizi za matibabu ya moyo hapa nchini kwani zipo nchi ambazo hazina kabisa huduma za matibabu haya”, alisema Mhe. Balozi Lotem.

Akizungumzia ujio wa Balozi wa Israel Mwenyekiti wa Bodi ya Wadhamini ya JKCI Prof. William Mahalu  alisema JKCI na Israel wamekuwa na uhusiano wa muda mrefu, uhusiano unaozaa matunda kwani Taasisi imefaidika na taaluma zinazotolewa Israel pamoja na watoto kwenda nchini Israel kwa ajili ya matibabu ya moyo.

“Tunaamini baada ya Balozi wa Israel kufika hapa JKCI na kuona tunachokifanya uhusiano wetu utaendelea kujengeka zaidi kwani taaluma ya upasuaji wa moyo ni endelevu na wenzetu kutoka Israel wameendelea zaidi”.

“Israel inapokuja kufanya kambi maalum katika Taasisi yetu utuletea vifaa tiba, taaluma mpya pamoja na kuendelea kujenga uhusiano ambao umepelekea hata wataalam wetu kwenda nchini Israel kwa ajili ya kujifunza”, alisema Prof. Mahalu

kwa upande wake Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge alisema Serikali ya Israel imekuwa ikitoa vifaa vya matibabu ya moyo na kutoa misaada ya matibabu kwa watoto wenye magonjwa ya moyo kwa kuwapeleka nchini Israel kwa ajili ya kufanyiwa upasuaji wa moyo bila kulipia gharama yoyote ile.

Dkt. Kisenge alisema zaidi ya watoto 1000 wa Tanzania bara na Zanzibar wameshapata matibabu kupitia wataalam wa afya kutoka nchini Israel lakini pia wataalam wa JKCI kufaidika na uhusiano huo hivyo kupata nafasi ya kwenda nchini Israel kwa ajili ya kuongezewa ujuzi.

“Daktari bingwa wa upasuaji wa moyo kwa watoto wa kwanza hapa nchini alipata mafunzo ya miaka mitano nchini Israel, mafunzo hayo ni ya gharama kwani kumpa mafunzo daktari mmoja iligharimu zaidi ya milioni 60 ambazo zilitolewa na Serikali ya Israel”.

“Wafanyakazi wengine 16 wa sekta ya afya nao walipata nafasi ya kwenda nchini Israel kupata mafunzo ili kusaidia katika kutoa huduma wakati wa upasuaji mkubwa wa moyo kwa watoto”, alisema Dkt. Kisenge ambaye pia ni daktari bingwa wa magonjwa ya moyo.

Dkt. Kisenge alisema Balozi wa Israel kafurahishwa na huduma za matibabu ya moyo zinayotolewa hapa nchini hivyo kuiomba JKCI kuendelea kuwapa ujuzi madaktari wengine ili waweze kutoa huduma kwa wananchi wao pamoja na nchi za jirani kwani nchi nyingi za Afrika hazina huduma za matibabu ya moyo.

Aidha Dkt. Kisenge aliwakumbusha wananchi kujiunga na bima ya afya kwani matibabu ya moyo ni ya gharama hivyo watakapojiunga na bima ya afya kutawasaidia kumudu gharama za matibabu kwani ugonjwa utokea wakati wowote.