Shilingi Bilioni 8 yawekezwa JKCI-ALMC kuelekea AFCON 2027

Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge, Mwenyekiti wa Bodi ya Wadhamini ya Taasisi ya Moyo Jakaya Kikwete – Arusha Lutheran Medical Centre (JKCI-ALMC) Peter Maduki na Mkurugenzi wa JKCI-ALMC Dkt. Tatizo Waane wakikagua wodi za wagonjwa mashuhuri (VIP Wards) zilizopo katika Taasisi hiyo iliyopo jijini Arusha.

Mkurugenzi wa Taasisi ya Moyo Jakaya Kikwete – Arusha Lutheran Medical Centre (JKCI-ALMC) Dkt. Tatizo Waane akiwaonesha wadau maeneo ya wodi za watu mashuhuri (VIP Wards) zilizopo katika Taasisi hiyo iliyopo jijini Arusha.

Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge akizungumza na waandishi wa habari wakati wa mkutano na waandishi hao kuelezea utayari wa JKCI-ALMC katika kutoa huduma bora za afya kuelekea michuano ya AFCON 2027.

Mkurugenzi wa Taasisi ya Moyo Jakaya Kikwete – Arusha Lutheran Medical Centre (JKCI-ALMC) Dkt. Tatizo Waane akizungumza na waandishi wa habari wakati wa mkutano na waandishi hao kuelezea utayari wa JKCI-ALMC katika kutoa huduma bora za afya kuelekea michuano ya AFCON 2027.

Na JKCI

*********************************************************************************************************************

Shilingi bilioni 8 zawekezwa na Taasisi ya Moyo Jakaya Kikwete – Arusha Lutheran Medical Centre (JKCI-ALMC) kufanya ukarabati wa Hospitali hiyo, kununua vifaa tiba vya kisasa vinavyotumia akili unde na kuanzisha huduma za vyumba vya wagonjwa mashuhuri (VIP Wards) kuelekea mashindano ya AFCON 2027. 

Uwekezaji huo umeenda sambamba na uwekezaji wa smart device ambazo JKCI-ALMC imejipanga kuweka katika hoteli mbalimbali zilizopo Arusha ili wageni watakaofika nchini wawezi kufanya uchunguzi wa viashiria vya magonjwa ya moyo wanapokuwa hotelini.

Akizungumza na waandishi wa habari leo jijini Arusha Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge alisema vyumba vya VIP vilivyopo JKCI-ALMC vinaweza kugeuzwa matumizi na kuwa vyumba vya uangalizi maalumu (ICU) pale hali ya mgonjwa inapobadilika hivyo kuokoa maisha kwa wakati.

“Maboresho tunayoyafanya katika Taasisi yetu yanaenda kuwasaidia wananchi wa kanda ya Kaskazini lakini pia yataitambulisha nchi yetu kuwa na Taasisi ya afya yenye mazingira mazuri, huduma bora za afya zenye hadhi ya kimataifa wakati wa mashindano ya AFCON 2027”, alisema Dkt. Kisenge

Dkt. Kisenge alisema JKCI imejipanga kuweka wataalamu wake katika viwanja vitakavyotumika wakati wa mashindano ya AFCON 2027 ili changamoto za kiafya zinapotokea katika michuano hiyo huduma za afya zinatolewa kwa wakati na kuwawezesha mashabiki wa mashindano hayo kupata huduma za uchunguzi wa afya wanapokuwa uwanjani.

Sambamba na maandalizi yanayofanywa na JKCI-ALMC Dkt. Kisenge alisema shilingi bilioni 18 zimetengwa na Serikali kwaajili ya ujenzi wa jengo litakalojengwa JKCI Hospitali ya Dar Group kwaajili ya  kutoa huduma za afya kwa wanamichezo wa Afrika Mashariki na Kati.

Aidha Dkt. Kisenge amemshukuru Rais wa Jamhuri ya Muungano wa Tanzania Mhe. Dkt. Samia Suluhu Hassan kwa kuendelea kuwekeza katika sekta ya afya ikiwemo mpango wa kuwekeza zaidi ya shilingi bilioni 20 JKCI-ALMC ili kuhakikisha huduma za afya kanda ya kaskazini zinaimarika

“Uwekezaji huo utahusisha ufungwaji wa mashine kubwa za kufanya uchunguzi wa afya ikiwemo CT Scan, mtambo wa CathLab pamoja na MRI ambayo kwa Afrika Mashariki na kati ndio itakuwa MRI ya kwanza kwa ukubwa”,

“Tunataka JKCI-ALMC kuwa Hospitali ya kwanza Afrika Mashariki na kati kutumia mifumo ya kiautomatiki katika kila hatua anayopita mgonjwa, na kwa kufanya hivyo tumeendelea kutekeleza Dira ya Maendeleo ya Taifa ya 2050 kwa kushirikiana na wadau mbalimbali wakiwemo Global Med Care katika kuhakikisha huduma za afya zinaboreshwa”, alisema Dkt. Kisenge

Kwa upande wake Mkurugenzi wa Taasisi ya Moyo Jakaya Kikwete – Arusha Lutheran Medical Centre (JKCI-ALMC) Dkt. Tatizo Waane alisema uboreshwaji wa huduma za afya katika tawi la JKCI-ALMC umechangia katika kuboresha afya za wagonjwa kupitia huduma bingwa bobezi wanazozitoa.

“JKCI-ALMC ni moja ya hospitali ambayo ilikaguliwa na kuona inafaa kutoa huduma za matibabu wakati wa mashindano ya AFCON, matibabu tutakayotoa yatahusisha wananchi, wachezaji, na mashabiki watakaokuja nchini”, alisema Dkt. Waane

Dkt. Waane alisema matibabu yanayotolewa na JKCI-ALMC ni matibabu ambayo mgonjwa anaweza kuyapata mahali popote duniani kutokana na uwekezaji mkubwa wa wataalamu, vifaa tiba vya kisasa na ujuzi.