DC Handeni aishukuru JKCI kwa kugusa mioyo ya wananchi

Mkuu wa Wilaya ya Handeni Mhe. Albart Msando akizungumza na wananchi wa Wilaya hiyo leo wakati wa ufunguzi wa kambi maalumu ya Mhe. Dkt. Samia Suluhu Hassan tiba mkoba inayofanywa na wataalamu wa afya kutoka Taasisi ya Moyo Jakaya Kikwete (JKCI) na kufanyika kwa siku mbili katika Hospitali ya Wilaya ya Handeni iliyopo mkoani Tanga.

Mkuu wa Wilaya ya Handeni Mhe. Albart Msando akipima shinikizo la damu leo baada ya ufunguzi wa kambi maalumu ya Mhe. Dkt. Samia Suluhu Hassan tiba mkoba inayofanywa na wataalamu wa afya kutoka Taasisi ya Moyo Jakaya Kikwete (JKCI) na kufanyika kwa siku mbili katika Hospitali ya Wilaya ya Handeni iliyopo mkoani Tanga.

Daktari bingwa wa magonjwa ya moyo kwa watoto wa Taasisi ya Moyo Jakaya Kikwete (JKCI) Eva Wakuganda akielezea namna taasisi hiyo imejipanga kuwafikia wananchi wote leo wakati wa ufunguzi wa kambi maalumu ya Mhe. Dkt. Samia Suluhu Hassan tiba mkoba inayofanyika kwa siku mbili katika Hospitali ya Wilaya ya Handeni iliyopo mkoani Tanga. 

Mkurugenzi wa Taasisi ya Marafiki wa Maendeleo Handeni (MMAHA) Mariam Mwanilwa akielezea namna taasisi hiyo imejipanga kuisaidia jamii kupata huduma za afya wakati wa ufunguzi wa kambi maalumu ya Mhe. Dkt. Samia Suluhu Hassan tiba mkoba inayofanywa na wataalamu wa afya kutoka Taasisi ya Moyo Jakaya Kikwete (JKCI) kwa siku mbili katika Hospitali ya Wilaya ya Handeni iliyopo mkoani Tanga.

Daktari wa huduma za dharura kutoka Taasisi ya Moyo Jakaya Kikwete (JKCI) Nicole Kinyawa akizungumza na mkazi wa Handeni mara baada ya kufanya vipimo vya moyo wakati wa kambi maalumu ya siku mbili ya Mhe. Dkt. Samia Suluhu Hassan tiba mkoba inayofanyika katika Hospitali ya Wilaya ya Handeni iliyopo mkoani Tanga. Kulia ni Dkt. Philipina Marandu wa Hospitali ya Wilaya ya Handeni.

Wananchi wa Wilaya ya Handeni wakiwa katika foleni ya kupata huduma za uchunguzi na matibabu ya moyo wakati wa kambi maalumu ya siku mbili ya Mhe. Dkt. Samia Suluhu Hassan tiba mkoba inayofanywa na wataalamu wa Taasisi ya Moyo Jakaya Kikwete (JKCI) katika Hospitali ya Wilaya ya Handeni iliyopo mkoani Tanga

Na: JKCI

********************************************************************************************************************

Wataalamu wa Taasisi ya Moyo Jakaya Kikwete (JKCI) wametakiwa kuendelea kutoa huduma na kugusa maisha ya wananchi wanaohitaji huduma za kibingwa zikiwemo huduma za uchunguzi na matibabu ya moyo.

Rai hiyo imetolewa leo na Mkuu wa Wilaya ya Handeni Mhe. Albart Msando wakati wa ufunguzi wa kambi maalumu ya siku nne ya Mhe. Dkt. Samia Suluhu Hassan tiba mkoba inayofanywa na wataalamu kutoka Taasisi ya Moyo Jakaya Kikwete (JKCI) Wilayani Handeni.

“Kwa niaba ya wananchi wa Handeni pamoja na Taasisi ya Marafiki wa Maendeleo Handeni (MMAHA) waliowezesha zoezi hili, tunawashukuru sana wataalamu kutoka JKCI kwa kuwezesha matibabu haya kufanyika katika wilaya yetu, kazi mnayoifanya ni kubwa sana na mmekuwa mkiifanya kwa kujitoa bila kuchoka”, alisema Mhe. Msando

Mhe. Msando alisema ofisini kwake mara nyingi wanapokea watu wanaofika kuomba msaada wa matibabu, ambapo ofisi huwapa barua ambayo inawapasa wapite katika mnyororo mrefu hadi waweze kufikia hatua ya mwisho ya kupata msamaha wa matibabu hatua ambazo huchukua muda mrefu.

“Katika Wilaya yetu ya Handeni kama wewe ni mzima unaweza usijue changamoto kubwa walizonazo wananchi inapokuja katika masuala ya ugonjwa, afya uliyonayo ni zawadi ambayo Mungu ametujalia lakini wapo watu ambao wanateseka sana katika Wilaya yetu kutokana na magonjwa mbalimbali”,

“Wapo wananchi wetu wanatoka Handeni wanaenda Dar es Salaam kwaajili ya matibabu na huko hawana ndugu, hivyo kuteseka lakini kupitia ujio wenu hapa tunarahisisha upatikanaji wa huduma hizi za kibingwa”, alisema Mhe. Msando

Akizungumzia kambi hiyo Daktari bingwa wa magonjwa ya moyo wa Taasisi ya Moyo Jakaya Kikwete (JKCI) Eva Wakuganda alisema timu ya wataalamu bingwa wa moyo kwa watoto na watu wazima ikiwa na vifaa tiba vya kisasa imeweka kambi ya siku nne mkoani Handeni kuwafanyia uchunguzi wananchi wa Wilaya hiyo.

Dkt. Eva alisema mbali na kutoa huduma za uchunguzi wa magonjwa ya moyo wale wote watakaokutwa na magonjwa ya moyo, shinikizo la juu la damu (BP) na sukari watapatiwa dawa bila gharama.

“JKCI imekuwa ikiona wagonjwa mbalimbali wa moyo na wakati mwingine tumekuwa tukiwaona wakiwa wamechelewa hivyo ikaanzisha kambi maalumu ili tuweze kuwagundua wagonjwa wa moyo mapema na kuwapa matibabu”, alisema Dkt. Eva

Dkt. Eva alisema JKCI imekuwa ikitoa huduma za uchunguzi wa magonjwa ya moyo kwa wananchi katika ngazi ya mikoa na sasa hivi imeshuka katika ngazi ya wilaya na hapo baadaye itaweka miundombinu ya kuwafikia wananchi katika ngazi ya vitongoji.

“Hatua hizi tunazozifanya ni katika kuona namna tatizo la moyo jinsi lilivyo, hali za wagonjwa wa moyo katika ngazo hizo na namna ambavyo tutaweza kuwasaidia kwa wakati”, alisema Dkt. Eva

Kwa upande wake Katibu Tawala wa Wilaya ya Handeni Magreth Kilo alitoa shukrani za dhati kwa Taasisi ya Moyo Jakaya Kikwete (JKCI) kwa kazi kubwa na nzuri wanayoifanya kwa wananchi wakiwemo wananchi wa Handeni

“Wananchi wengi wamekuwa wakifika katika Ofisi ya Mkuu wa Wilaya kuomba msaada wa matibabu na hasa matibabu ya moyo kwa watoto na watu wazima, ujio wenu unaenda kutusaidia kupunguza changamoto hii ya upatikanaji wa matibabu”, alisema Magreth

Magreth alisema wataalamu wa JKCI wanaweza kuona wanafanya jambo dogo katika kutoa huduma hizo lakini kwa wananchi wa Handeni wamefanya jambo kubwa linalogusa mioyo ya wana Handeni wengi.

Naye mwananchi aliyepata huduma katika kambi hiyo Idd Hassan ameushukuru uongozi wa Wilaya ya Handeni kwa kuwezesha wataalamu wa JKCI kufika katika wilaya hiyo na kutoa huduma bila gharama kwa wananchi wa Handeni.

“Tunawashukuru sana viongozi wetu, leo tumepata huduma za kuchunguza mioyo yetu kwakweli tumefurahi sana”, alisema Idd