Wasanii waishukuru Serikali upimaji moyo Kawe

Afisa Uuguzi wa Taasisi ya Moyo Jakaya Kikwete (JKCI) Flora Zacharia akimpima Shinikizo la damu, mapigo ya moyo na kiwango cha oksijeni mwilini msanii wa muziki kutoka lebo ya WCB Wasafi Zuhura Othman Soud (Zuchu) alipofika katika Kliniki ya Taasisi hiyo iliyopo Kawe kwaajili ya ufanya uchunguzi wa magonjwa ya moyo jijini Dar es Salaam.

Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge akizungumza na msanii wa muziki kutoka lebo ya WCB Wasafi Zuhura Othman Soud (Zuchu) mara baada ya kufanya vipimo vya moyo katika Kliniki ya Taasisi hiyo iliyopo Kawe jijini Dar es Salaam.

Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge akimpatia majibu yake msanii wa muziki kutoka lebo ya WCB Wasafi Mbwana Yusuph Kilungi (Mbosso) mara baada ya kufanya vipimo vya moyo katika Kliniki ya Taasisi hiyo iliyopo Kawe jijini Dar es Salaam. Kushoto ni msanii kutoka lebo ya WCB Wasafi D Voice

Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge akiwa katika picha ya pamoja na viongozi wa mashirikiso ya muziki, sanaa, maonesho, maigizo na wanamuziki mara baada ya kufika katika kliniki ya Taasisi hiyo iliyopo Kawe kwaajili ya kupima moyo.

Na: JKCI

*******************************************************************************************************

Wasanii kutoka lebo ya WCB Wasafi wajitokeza kufanya uchunguzi na matibabu ya magonjwa ya moyo katika Kliniki ya Taasisi ya Moyo Jakaya Kikwete (JKCI) iliyopo Kawe.

Mwitikio kutoka kwa wasanii hao umekuja baada ya kampeni inayofanywa na Taasisi ya Moyo Jakaya Kikwete (JKCI) kupitia kambi maalumu ya tiba mkoba ya Mhe. Dkt. Samia Suluhu Hassan ya kuwafanyia uchunguzi na matibabu ya moyo wasanii na wanamichezo nchini kupunguza madhara yanayoweza kusababishwa na magonjwa hayo.

Akizungumza na waandishi wa habari jijini Dar es Salaam Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge alisema JKCI itaendelea kuihamasisha jamii kupima magonjwa yasiyo ya kuambukiza yakiwemo magonjwa ya moyo.

“Wasanii kutoka lebo ya WCB Wasafi ambao ni Zuchu, Mbosso na D Voice leo wamifika hapa katika kliniki yetu kupima moyo na kuhamasisha wenzao kuwa na tabia ya kufanya uchunguzi wa magonjwa ya moyo kwani magonjwa haya husababisha vifo vingi duniani huku wengine wakipoteza maisha wakiwa na umri mdogo”, alisema Dkt. Kisenge

Dkt. Kisenge aliwataka wasanii kuendelea kujitokeza katika kliniki ya JKCI iliyopo Kawe na Oysterbay kupata elimu juu ya magonjwa ya moyo, kupimwa afya ya moyo na kupata elimu ya namna ya kujikinga na magonjwa ya moyo.

Msanii kutoka lebo ya WCB Mbwana Yusuph Kilungi (Mbosso) amemshukuru Rais wa Jamhuri ya Muungano wa Tanzania Mhe. Dkt. Samia Suluhu Hassan kwa kutoa fursa hiyo kwa wasanii kuchunguza afya zao kwani wengi wao hawana tabia ya kufanya uchunguzi wa afya kama hawana dalili za kuumwa.

Mbosso alisema yeye amekuwa mhanga wa magonjwa hayo ya moyo ambapo huko awali alishakutwa na tatizo hilo na kupatiwa matibabu hivyo kuamini kuwa amepona.

“Nawashukuru wataalamu wa Taasisi hii, leo nimefika hapa nimefanyiwa uchunguzi na tatizo langu nililokuwa nalo awali kuonekana bado lipo, Namshukuru Dkt. Kisenge ameniahidi kuwa tatizo hili ni dogo na atalisimamia nipate matibabu na kupona kabisa”, alisema Mbosso

Kwa upande wake Katibu Mtendaji Baraza la Sanaa la Taifa (BASATA) Dkt. Kedmon Mapana ameishukuru Taasisi ya Moyo Jakaya Kikwete (JKCI) kwa kushirikiana na Taasisi ya Mama Ongea na Mwanao kuwezesha huduma za uchunguzi wa magonjwa ya moyo kwa wasanii nchini.

Kipekee nawashukuru marais wa mashirikisho ya sanaa ambao wao wamejitokeza kwa wingi akiwemo rais wa shirikisho la muziki Tanzania, rais wa shirikisho la sanaa za ufundi, kaimu katibu wa shirikisho la sanaa za maonesho, na rais wa shirikisho la filamu Tanzania kujitokeza kwao ni sehemu ya kuwahamasisha wadau wao kutumia fursa hii vizuri”, alisema Dkt. Mapana

Dkt. Mapana amewashukuru wasanii wakiwemo ma gwiji na nguli wa muziki Tanzania kama Diamond Platnum kuhamasisha wasanii wenzao kupima afya na wengine kufika kupima bila ya kuwa na uoga kama ambavyo amefanya Zuchu, D Voice na Mbosso.

“Kupima afya kabla ya ugonjwa ni muhimu, Rais wetu anataka sisi wasanii tufanya kazi vizuri tukiwa na afya bora kwani afya yetu ndio mtaji wetu na sanaa zetu ndio ajira zetu”, alisema Dkt. Mapana

Naye Makamu Mwenyekiti Chama cha Muziki wa Injili Tanzania Dkt. Catherine Lukindo ameishukuru Serikali ya awamu ya sita kwa kuona umuhimu wa kuwapatia wasanii nafasi ya kupima afya zao.

Dkt. Lukindo amewaomba waimbaji wa nyimbo za injili nao kuwa mstari wa mbele kujitokeza kupima afya kwani kupitia chama hicho wapo wasanii waliopoteza maisha yao kutokana na tatizo la shinikizo la juu la damu pamoja na magonjwa ya moyo.

“Fusra hii tusiichezee mimi binafsi katika familia yangu tumekuwa wahanga wa magonjwa haya ya moyo, kuna siku kaka yangu alifika Hospitali Tanga akiwa na maumivu makali ya kifua akaambiwa ana tatizo la moyo na kupewa gari kukimbizwa hapa JKCI ambapo alipatiwa matibabu na kupona, hivyo tusisubiri hadi tufikie katika hatua hiyo ndio twende hospitali”, alisema Dkt. Lukindo

Dkt. Lukindo alitoa shukrani zake kwa uongozi wa Taasisi hiyo kwa kuwapokea wasanii, kuwapa elimu ya magonjwa ya moyo na kuwapa huduma za matibabu bila ubaguzi.