JKCI yapongezwa huduma za kibingwa matibabu ya moyo

Mkurugenzi wa Magonjwa ya moyo wa Taasisi ya Moyo Jakaya Kikwete (JKCI) Dkt. Tatizo Waane akipokea cheti cha utambuzi wa taasisi hiyo kama mdau wa mkutano wa 56 wa chama cha madaktari unaoendelea katika ukumbi wa St. Gasper Hotel and Conference centre uliopo jijini Dodoma.

Daktari bingwa wa upasuaji wa Moyo na mratibu wa uhakiki na udhibiti ubora wa Taasisi ya Moyo Jakaya Kikwete (JKCI) Adelphina Ncheye akitoa maelezo kwa washiriki  wa Mkutano wa 56 wa chama cha madaktari Tanzania waliotembelea katika banda la JKCI jana jijini Dodoma.

Madaktari wa Taasisi ya Moyo Jakaya Kikwete (JKCI) wakiwa katika picha ya pamoja baada ya kutoka katika mkutano 56 wa Chama Cha Madaktari unaofanyika katika ukumbi wa St. Gasper Hotel and Conference centre uliopo jijini Dodoma.

Na: Gilbert Mmbaga

*********************************************************************************************************

Naibu Waziri, ofisi ya Waziri Mkuu, Kazi, Ajira na wenye Ulemavu Mhe. Patrobas Paschal Katambi ameipongeza Taasisi ya Moyo Jakaya Kikwete (JKCI) kwa kuendelea kutoa huduma za kibingwa bobezi za matibabu ya moyo kwa wagonjwa wanaohitaji huduma hizo

Aidha Mhe Katambi ameipongeza taasisi hiyo kwa kuongeza vituo vya utoaji wa huduma za uchunguzi na matibabu ya moyo katika maeneo mbalimbali ndani na nje ya nchi.

Pongezi hizo zimetolewa jana jijini Dodoma alipotembelea banda la Taasisi hiyo lililopo katika Mkutano wa 56 wa chama cha madaktari Tanzania unaofanyika katika ukumbi wa St. Gasper Hotel and Conference centre.

Mhe. Katambi ameiomba taasisi hiyo kuendelea kupanua wigo wakutoa huduma za magtibabu ya moyo na ikiwezekana wafungue matawi ya taasisi hiyo hata nje ya nchi.

“Nawapongeza sana JKCI kwa juhudi mnazofanya za kusambaza huduma hizi bobezi za matibabu ya moyo kwa wagonjwa waliopo nchini na kupunguza furaa za matibabu haya nje ya nchi”, alisema Mhe. Katambi.

Kwa upande wake Mkuu wa Kitengo cha Mafunzo na Utafiti wa Taasisi ya Moyo Jakaya Kikwete (JKCI) Dkt. Pedro Pallangyo alisema JKCI imekuwa ikitoa mafunzo kwa wataalamu wa afya katika hospitali mbalimbali nchini kila wanapofanya huduma za tiba mkoba katika maeneo mbalimbali lengo likiwa kuwajengea uwezo watoa huduma za afya.

“Kimsingi nakubaliana na Mhe. Naibu Waziri na kama taasisi tumekuwa kukitoa mafunzo kila tunapokwenda kutoa huduma za tiba mkoba maeneo mbalimbali nchini”, alisema Dkt. Pedro

Dkt. Pedro alisema JKCI imekuwa ikishirikiana na vyuo mbalimbali vya afya ndani na nje ya nchi kutoa mafunzo kwa wanafunzi ambao ni wataalamu wa afya.

Joseph Birusha mwanafunzi katika Chuo Kikuu cha Dodoma alisema JKCI ikiwa na Chuo chake itawasaidia wataalamu wa afya ambao wanataka kuchukua fani ya ubingwa bobezi wa magonjwa ya moyo kuwa na sehemu sahihi zaidi ya kupata masomo hayo.

“Taasisi za afya za kibingwa zikiwa na vyuo vyake zitawasaidia wataalamu wa afya wanaotaka kusomea ubingwa bobezi kupata sehemu sahihi ambayo itawawezesha kusoma na kufanya mazoezi kwa vitendo kuwawezesha kupata ujuzi stahiki”, alisema Joseph.

Naye Abdullah Chuma mshiriki wa mkutano kutoka Chuo Kikuu cha Dar es Salaam ndaki ya Mbeya aliongezea kwa kusema kukiwa na chuo kinachomilikiwa na taasisi ya afya itasaidia kupata wahudumu wa afya wenye uweledi na umakini kwenye nyanja hiyo.

“Kusoma kwenye chuo kinachomilikiwa na taasisi inasaidia kupata wahudumu na wataalamu wa afya waliobobea zaidi, mfano ukisomea JKCI unakuwa mtaalamu wa moyo na kuweza kuwahudumia wagonjwa wa moyo kwa ufanisi wa hali ya juu kwani ulisoma sehemu ambayo ulikuwa unaona utoaji huduma unavyofanywa”, alisema Abdullah.