JKCI kushirikiana na UDSM kutoa mafunzo bobezi ya matibabu ya moyo

Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge akizungumza na waandishi wa habari jijini Dar es Salaam kuhusu ushirikiano wa JKCI na Chuo Kikuu cha Dar es Salaam (UDSM) katika kutoa mafunzo bobezi ya matibabu ya moyo.

Naibu Makamu Mkuu wa Chuo Kikuu cha Dar es Salaam (UDSM) Prof. Bonaventure Rutinwa akizungumza na waandishi wa habari jijini Dar es Salaam kuhusu ushirikiano wa Chuo hicho na Taasisi ya Moyo Jakaya Kikwete (JKCI)  katika kutoa mafunzo bobezi ya matibabu ya moyo.

Mkuu wa Kitengo cha Mafunzo kutoka Taasisi ya Moyo Jakaya Kikwete (JKCI) Dkt. Khuzeima Khanbhai akielezea aina ya mafunzo yanayotolewa katika  taasisi hiyo wakati wa mkutano na waandishi wa habari kuhusu ushirikiano wa Chuo Kikuu cha Dar es Salaam (UDSM) na JKCI  katika kutoa mafunzo bobezi ya matibabu ya moyo.

 Mkufunzi wa mfunzo ya kuwahudumia wagonjwa wa dharura na mahututi wa Taasisi ya Moyo Jakaya Kikwete (JKCI) Joshua Ogutu akitoa tathmini ya mafunzo yanayotolewa na JKCI wakati wa mkutano na waandishi wa habari kuhusu ushirikiano wa Chuo Kikuu cha Dar es Salaam (UDSM) na Taasisi hiyo  katika kutoa mafunzo bobezi ya matibabu ya moyo.

********************************************************************************************************************************************************************************

Taasisi ya Moyo Jakaya Kikwete (JKCI) kushirikiana na Chuo Kikuu cha Dar es Salaam (UDSM) katika kutoa mafunzo bobezi ya matibabu ya moyo katika program za jinsi za kuwahudumia wagonjwa mahututi na wa dharura, upasuaji wa moyo na udaktari bingwa wa masuala ya kufanya upasuaji wa kutibu kwa njia ya tundu dogo la moyo.

Mafunzo mengine yanayotolewa ni pamoja na mfunzo endelevu yaliyoanza kutolewa na JKCI tangu mwaka 2021 ya namna ya kuwahudumia wagonjwa wa dharura, wagonjwa mahututi na wagonjwa wenye shida za figo wanaofanyiwa dialysis.

Akizungumza na waandishi wa habari jijini Dar es Salaam Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge alisema serikali imewekeza kwa kiasi kikubwa katika Hospitali za umma kuanzia hospitali za wilaya hadi za taifa ikiwemo ujenzi wa vyumba vya kuhudumia wagonjwa mahututi na wa dharura pamoja na vifaa tiba ambavyo vinahitaji wataalamu wabobezi kuvitumia katika kuwatibu wagonjwa.

Dkt. Kisenge alisema JKCI iliona nguvu kubwa ambayo Serikali imefanya hivyo kuamua kuwekeza katika kutoa mafunzo yatakayokidhi hadhi za kimataifa za kutumia vifaa hivyo na kutoka huduma stahiki kwa wagonjwa wa moyo, wagonjwa wa dharura, mahututi  na wagonjwa wanaofanyiwa usafishwaji damu kwenye figo (dialysis).

“Chuo Kikuu cha Dar es Salaam ni chuo cha kwanza kuanzisha kozi za afya hapa nchini, tumeona tushirikiane nao katika kutoa mafunzo haya ili wataalamu wanapomaliza mafunzo waweze kupata cheti kutoka chuo kinachotambulika duniani kote”, alisema Dkt. Kisenge

Dkt. Kisenge alisema mafunzo yatakayotolewa yatawafikia wataalamu wa afya waliopo nchi za Afrika mashariki na kati hivyo kuziomba hospitali zote nchini kutosita kuwapeleka wataalamu wao kupata fursa hiyo.

Kwa upande wake Naibu Makamu Mkuu wa Chuo Kikuu cha Dar es Salaam (UDSM) Prof. Bonaventure Rutinwa alisema UDSM imeanza ushirikiano na JKCI katika kutoa mafunzo yanayohusiana na tiba na sayansi shirikishi upande wa moyo kutokana na kuwepo na uhaba wa wataalamu katika fani hiyo.

Prof. Rutinwa alisema chuo hicho kimeamua kushirikiana na JKCI na kuanza kupitia mitaala ili kiweze kutoa mafunzo bobezi na ujuzi wa hali ya juu hivyo kuwalazimu kuwa na taasisi ambayo itatoa mafunzo kwa vitendo ya kile kinachofundishwa darasani.

“Kozi zote ambazo tutakuwa tunazitoa zitaenda kujikita zaidi katika kuwapatia wataalamu uwezo wa kutenda na sio nadharia”,

“Taasisi zote mbili zimepata ridhaa ya mamlaka zake na kuruhusu mashirikiano haya kuwepo hivyo kwakuanzia tutakuwa na kozi za muda mfupi lakini lengo letu ni kuifanya JKCI kuwa chuo kilichounganishwa na UDSM ambacho kitakuwa kinatoa mafunzo ya shahada chini ya Chuo Kikuu cha Dar es Salaam”, alisema Prof. Rutinwa

Naye mkufunzi wa mafunzo ya kuwahudumia wagonjwa wa dharura na mahututi kutoka Taasisi ya Moyo Jakaya Kikwete (JKCI) Joshua Ogutu alisema JKCI ilianza kutoa mafunzo kwa wauguzi wanaofanya kazi katika vyumba vya wagonjwa mahututi na wa dharura tangu mwaka 2021.

Ogutu ambaye pia ni Afisa Uuguzi katika Taasisi hiyo alisema mafunzo hayo yalianzishwa baada ya kuona uhitaji mkubwa uliopo katika kutoa huduma za kina za uuguzi na kuwepo na uhitaji wa wauguzi wenye uwezo wa kutumia vifaa vyote vinavyotoa huduma za dharura.

“Mafunzo yetu ya kwanza yalianza Decemba 2021 ambapo tulipata wanafunzi 13 waliohitimu mafunzo yao Julai 2022, Agosti 2022 tulisajili mafunzo ya awamu ya pili na kupata wanafunzI 22 ambao kati yao watatu walitoka nchini Rwanda na kumaliza mafunzo yao mwezi Aprili 2023”.

“Mafunzo ya awamu ya tatu tulisajili wauguzi 28 kati yao watatu walitoka nchini Zambia ambao walimaliza mwezi Februari mwaka huu na mafunzo yetu ya awamu ya nne tutayafanya kwa kushirikiana na UDSM yataanza tarehe 11 Machi mwaka huu ambapo hadi sasa tayari wanafunzi 12 wameshajisajili”, alisema Ogutu.

Ogutu alisema kupitia mafunzo wanayoyatoa kumekuwa na mafanikio makubwa kwani wanafunzi wote waliofanya mafunzo hayo wamekuwa wakipata fursa za ajira kirahisi.