Mashabiki wa Arsenal Afrika watoa msaada wa milioni 16 na kuchangia damu JKCI

 

Mashabiki wa Arsenal Afrika kutoka nchi za Tanzania, Kenya, Uganda, Rwanda, Zambia na Ethiopia wakiwa katika picha ya pamoja na Mkuu wa Wilaya ya Ilala Mhe. Edward Mpogolo pamoja na Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge wakati washabiki hao walipotembelea JKCI leo kwa ajili ya kuchangia matibabu ya watoto wenye matatizo ya moyo pamoja na kutoa damu kwa ajili ya watoto wanaofanyiwa upasuaji.

Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge akipokea mfano wa hundi ya shilingi milioni 16 kutoka kwa Mwenyekiti wa Mashabiki wa Arsenal Tanzania (ASCTZ) Raymond Anthony wakati mashabiki wa timu hiyo kutoka nchi za Afrika walipofika JKCI leo kwaajili ya kuchangia matibabu ya watoto wenye matatizo ya moyo pamoja na kutoa damu kwa ajili ya wanaofanyiwa upasuaji.

Mkuu wa Wilaya ya Ilala Mhe. Edward Mpogolo akizungumza na mashabiki wa  Arsenal Afrika wakati mashabiki hao walipofika katika Taasisi ya Moyo Jakaya Kikwete (JKCI) leo kwa ajili ya kuchangia matibabu ya watoto wenye matatizo  ya moyo pamoja na kutoa damu kwa ajili ya watoto wanaofanyiwa upasuaji.

Baadhi ya mashabiki wa  Arsenal Afrika  pamoja na wafanyakazi wa Taasisi ya Moyo Jakaya Kikwete (JKCI) wakisimsikiliza Mkuu wa Wilaya ya Ilala Mhe. Edward Mpogolo wakati wa hafla fupi ya kukabidhi mfano wa hundi ya shilingi milioni 16 iliyotolewa na mashabiki hao kwaajili ya kuchangia matibabu ya watoto wenye matatizo ya  moyo pamoja na kutoa damu kwa ajili ya watoto wanaofanyiwa upasuaji.

 Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge akizungumza na baadhi ya mashabiki wa Arsenal Afrika  waliokuwa wakichangia damu wakati mashabiki hao walipofika JKCI leo kwa ajili ya kuchangia matibabu ya watoto wenye matatizo ya moyo pamoja na kutoa damu kwa ajili ya watoto wanaofanyiwa upasuaji.

Mhadhiri kutoka Chuo Kikuu cha Teknolojia na Kilimo cha Jomo Kenyatta kilichopo nchini Kenya ambaye pia ni Afisa Uuguzi Tonny Mbaja akimpima shinikizo la damu shabiki mwenzake wa Arsenal Afrika  wakati mashabiki wa timu hiyo walipofika Taasisi ya Moyo Jakaya Kikwete (JKCI) leo kwa ajili ya kuchangia matibabu ya watoto wenye matatizo  ya moyo pamoja na kutoa damu kwa ajili ya watoto wanaofanyiwa upasuaji. 

Afisa kutoka Mpango wa Taifa wa Damu Salama (NBTS) Rosemary Bulemo akimtoa damu shabiki wa timu ya mpira wa miguu ya Arsenal wakati mashabiki wa timu hiyo kutoka nchi za Afrika walipofika Taasisi ya Moyo Jakaya Kikwete (JKCI) leo kwa ajili ya kuchangia matibabu ya watoto wenye matatizo ya moyo pamoja na kutoa damu kwa ajili ya watoto wanaofanyiwa.

Mteknolojia wa Maabara wa Taasisi ya Moyo Jakaya Kikwete (JKCI) Samweli Chuvaka akimfanyia usajili kabla ya kuchangia damu shabiki wa Arsenal Afrika wakati mashabiki wa timu hiyo walipofika Taasisi ya Moyo Jakaya Kikwete (JKCI) leo kwa ajili ya kuchangia matibabu ya watoto wenye matatizo ya moyo pamoja na kutoa damu kwa ajili ya watoto wanaofanyiwa upasuaji.

 Baadhi ya mashabiki wa Arsenal Afrika  wakitoa damu wakati mashabiki hao walipofika katika Taasisi ya Moyo Jakaya Kikwete (JKCI) leo kwa ajili ya kuchangia matibabu ya watoto wenye matatizo ya moyo pamoja na kutoa damu kwa ajili ya watoto wanaofanyiwa upasuaji.

*****************************************************************************************************************************************************************************

Mashabiki wa Arsenal Afrika wametoa msaada wa shilingi milioni 16 pamoja na kuchangia damu kwa ajili ya watoto wanaofanyiwa upasuaji wa moyo katika Taasisi ya Moyo Jakaya Kikwete (JKCI).

Akipokea msaada huo leo jijini Dar es Salaam Mkuu wa Wilaya ya Ilala Mhe. Edward Mpogolo aliwashukuru mashabiki wa timu hiyo na kusema kuwa fedha walizozitoa pamoja na  damu waliyochangia  itasaidia kuokoa maisha ya watoto wenye matatizo ya moyo.

Mhe. Mpogolo aliwaomba wadau mbalimbali kuunga mkono jitihada zinazofanywa na  Taasisi ya Moyo Jakaya Kikwete (JKCI) za kuhakikisha watanzania wanapata matibabu bora ya moyo kwa kuchangia gharama za matibabu kwa watu wasiokuwa na uwezo wakiwemo watoto ambao wako zaidi ya 600 wanasubiri kufanyiwa upasaji.

“Tumeambiwa wagonjwa zaidi ya 6000 wanafanyiwa upasuaji wa moyo robo tatu ya wagonjwa hawa ni watoto, Serikali imebeba jukumu la kumtibu mtoto kwani mzazi anapofika JKCI na kutambua mtoto wake ana shida ya moyo anakuwa tayari ametumia fedha nyingi na hivyo wengine kukosa kabisa fedha za kulipia gharama za matibabu”.

“Gharama za upasuaji wa moyo kwa watoto ni milioni nane hadi 10 Serikali inagharamia matibabu haya kwa zaidi ya asilimia 70 na wakati  mwingine kwa asilimia 100. Ninawashukuru sana washabiki wa Arsenal kwa kuiunga mkono Serikali na kuwasaidia watoto wenye uhitaji wamefanya matendo ya huruma kwa kuwakumbuka wasio na uwezo”, alisema Mhe. Mpogolo.

Kwa upande wake Mkurugenzi Mtendaji wa Taasisi ya Moyo Jakaya Kikwete (JKCI) Dkt. Peter Kisenge alisema kutokana na uwekezaji mkubwa uliofanywa na serikali wa kusomesha wataalamu pamoja na kununua vifaa tiba vya kisasa ambao umeiwezesha JKCI kutoa huduma bora za matibabu ya moyo barani Afrika ndiyo maana washabiki wa timu ya Arsenal Afrika wakaona wawatembelee na kutoa msaada kwa watoto.

 

“Mashabiki wa Arsenal Afrika wametutembelea wametoa mchango wa fedha za upasuaji wa moyo kwa watoto pamoja na kuchangia damu, mchango huu ni mkubwa kwani kufika kwa mashabiki hawa hapa JKCI kutatangaza utalii tiba na kuifanya Taasisi yetu kuendelea kutambulika kimataifa”.

“Ninawaomba wananchi wafanye mazoezi kwa kushiriki michezo mbalimbali kwani  magonjwa yasiyo ya kuambukiza yakiwemo ya yanaongezeka kwa kasi ni muhimu kufanya mazoezi ili kujikinga na magonjwa haya pia niniomba wananchi wajenge  tabia ya kuisaidia jamii inayowazunguka”, alisema Dkt. Kisenge.

Naye katibu wa Arsenal Tanzania Mboka Francis alisema mwaka 2012 mashabiki wa timu hiyo hapa nchini walianza kukutana na kufanya shughuli mbalimbali na ilipofika mwaka 2014 wakatambulika Arsenal London .

“Miaka ya nyuma tulikuwa tukikutana tunaangalia mpira wa Arsenal na kujadili maendeleo ya timu yetu, baadaye tukaona tufanye kitu cha kuisaidia jamii inayotuzunguka ambayo inakabiliwa na changamoto mbalimbali. Unaweza kuona mchango tulioutoa ni mdogo lakini tunafanya hivi kwa kuihamasisha jamii ifanye vitu kama hivi na kuiokoa jamii yao inayowazunguka”, alisema Francis.

Nao mashabiki wa Arsenal Afrika walisema wamekuwa na tabia ya kukutana kila mwaka katika nchi watakayoichagua kwa ajili ya kubadilishana mawazo na kuchangia jamii inayowazunguka.

“Tumewapokea wenzetu kutoka nchi mbalimbali za Afrika, tumekuwa na ushirikiano mkubwa sisi tuko  sehemu ya jamii hivyo basi furaha ya kushabikia timu yetu tuliyokuwa nayo tunatakiwa kuishirikisha jamii ndiyo maana tunawasaidia watu wasiokuwa na uwezo ili nao wapate furaha”.

“Ukiwa shabiki wa michezo  uwe  zaidi ya michezo na kuendeleza undugu kwa kuwashika wengine mkono na kugusa maisha yao”, alisema Steven Matinya shabiki wa Arsenal Tanzania.

 “Licha ya kuichangia fedha timu yetu ya Arsenal, kila mwaka tunaungana kutoka nchi mbalimbali Afrika tukiwa na  lengo moja la kurudisha kwa jamii kile tulichokuwa nacho kwa kuwasaidia watu wasio na uwezo, tunafanya utalii na tunachangia damu kwa ajili ya wagonjwa”, alisema Peter Mzembi kutoka tawi la Arsenal Kericho Kenya.

Kila mwaka mashabiki wa timu hiyo kutoka nchi mbalimbali Afrika wanakutana katika nchi watakayoichagua kwa ajili ya kufanya tamasha la kubadilishana mawazo mbalimbali pamoja na kufanya tukio la hisani la kuchangia wahitaji.Kwa mwaka huu mashabiki hao wapatao 361 kutoka Kenya, Uganda, Rwanda, Ethiopia na Zambia wamekutana jijini Dar es Salaam Tanzania.