Chama cha madaktari bingwa wa kupandikizaji vifaa na tiba ya mfumo wa umeme wa moyo kuboresha huduma kwa wagonjwa

Daktari bingwa wa magonjwa ya moyo Johnson Lwakatare akimkabidhi muongozi wa chama Rais wa Chama cha Madaktari Bingwa wa upandikizaji vifaa na tiba ya magonjwa ya mfumo wa umeme wa moyo (Device and arrhythmia society of Tanzania) Dkt. Yona Gandye wakati wa uzinduzi wa chama hicho uliofanyika jana jijini Dar es Salaam.

Rais wa Chama cha Madaktari Bingwa wa upandikizaji vifaa na tiba ya magonjwa ya mfumo wa umeme wa moyo (Device and arrhythmia society of Tanzania) Dkt. Yona Gandye akizungumza na wanachama wa chama hicho jana wakati wa uzinduzi uliofanyika jijini Dar es Salaam.

Makamu wa Rais wa Chama cha Madaktari Bingwa wa upandikizaji vifaa na tiba ya magonjwa ya mfumo wa umeme wa moyo (Device and arrhythmia society of Tanzania) Dkt. Khuzeima Khanbhai akielezea malengo ya chama hicho jana wakati wa uzinduzi uliofanyika jijini Dar es Salaam.

Rais wa Chama cha Madaktari bingwa wa magonjwa ya ndani Tanzania Mwanaada Kilima akiwapongeza wataalamu wanaotoa huduma za matibabu ya mfumo wa umeme wa moyo wakati wa uzinduzi wa Chama cha Madaktari Bingwa wa upandikizaji vifaa na tiba ya magonjwa ya mfumo wa umeme wa moyo (Device and arrhythmia society of Tanzania) uliofanyika jana jijini Dar es Salaam.

Baadhi ya wataalamu wa afya wakifuatilia yaliyokuwa yakiendelea wakati wa uzinduzi wa Chama cha Madaktari Bingwa wa upandikizaji vifaa na tiba ya magonjwa ya mfumo wa umeme wa moyo (Device and arrhythmia society of Tanzania) uliofanyika jana jijini Dar es Salaam.

Picha na:  Khamis Mussa

********************************************************************************************************

Madaktari wa moyo wanaotoa huduma za matibabu kwa wagonjwa wenye matatizo ya mfumo wa umeme wa moyo waandika historia kwa kuanzisha Chama cha madaktari bingwa wa upandikizaji vifaa na tiba ya magonjwa ya mfumo wa umeme wa moyo (Device and arrhythmia society of Tanzania).

Akizungumza jana wakati wa uzinduzi wa chama hicho Rais wa Chama Dkt. Yona Gandye alisema madaktari wanaotoa huduma kwa wagonjwa wenye matatizo ya mfumo wa umeme wa moyo wameungana kwa pamoja na kukutanisha wadau mbalimbali duniani kujadili namna ya kutatua changamoto ambazo wagonjwa hao wamekuwa wakipia.

Dkt. Gandye ambaye pia ni Daktari bingwa wa moyo Taasisi ya Moyo Jakaya Kikwete (JKCI) alisema katika mkutano huo wamejadiliana na kuona changamoto katika kutoa huduma kwani wanatambua hiyo ni moja ya huduma ambayo hapa nchini haijapewa kipaumbele kutokana na uchache wa wataalamu na maeneo ya kutoa huduma kuwa machache.

“Tumeweza kutengeneza mikakati na kuongeza ufahamu kwa wataalamu wa afya wengine ili kutoa fursa kwa wagonjwa wenye matatizo hayo kupata huduma sehemu tofauti na kutibiwa kwa wakati”, alisema Dkt. Gandye

Kwa upande wake Mkurugenzi Mtendaji wa JKCI Dkt. Peter Kisenge alisema matatizo ya mfumo wa umeme wa moyo ni makubwa na yanachangia vifo vingi duniani huku wengine wakipoteza maisha wakiwa na umri mdogo.

Dkt. Kisenge alisema sababu zinazosababisha matatizo ya mfumo wa umeme wa moyo ni pamoja na magonjwa ya mishipa ya damu ama magonjwa ya kuzaliwa nayo yanayoweza kupelekea hitilafu katika mfumo wa umeme wa moyo.

“Uwepo wa chama hiki utasaidia kutoa mafunzo kwa wataalamu wa afya katika hatua mbalimbali za kitaaluma lakini kutoa mafunzo ya namna wagonjwa hao wanatakiwa kufanya pale anapogundulika kuwa na tatizo la mfumo wa umeme wa moyo”, alisema Dkt. Kisenge

Naye Rais wa Chama cha Madaktari bingwa wa magonjwa ya ndani Tanzania Mwanaada Kilima alisema Tanzania inajivunia kuanzishwa kwa chama hicho kwani ni sehemu ya mapambano na nguvu zinazowekwa katika kupambana na magonjwa ya ndani ikiwemo magonjwa ya mfumo wa umeme wa moyo.

Dkt. Mwanaada ambaye pia ni daktari bingwa wa magonjwa ya ndani na mfumo wa upumuaji Hospitali ya Taifa Muhimbili alisema jitihada za uanzishwaji wa chama hicho zinapaswa kuungwa mkono kwa lengo la kuwasaidia wagonjwa kupata matibabu stahiki.

“Sisi kama chama cha magonjwa ya ndani tunaliunga mkono suala hili na tuko hapa kutoa ushirikiano wowote unaohitajika kwaajili ya kupeleka nguvu hizi mbele kwani tunatambua magonjwa haya hayajapewa kipaumbele japokuwa yanasababisha vifo vingi katika jamii”, alisema Dkt. Mwanaada