Mashine za kisasa kutumika kuchunguza moyo Geita

Daktari bingwa wa magonjwa ya moyo wa Taasisi ya Moyo Jakaya Kikwete (JKCI) Salehe Mwinchete na mwenzake kutoka Hospitali ya Rufaa ya Kanda Chato (CZRH) Liberius Libent wakimfanyia kipimo cha kuangalia jinsi moyo unavyofanya kazi mwananchi aliyetembelea banda la JKCI na CZRRH kliniki ya moyo wakati wa maonesho ya 7 ya Teknolojia ya Madini yanayofanyika katika viwanja vya bombambili Mkoani Geita.

Afisa Muuguzi wa Taasisi ya Moyo Jakaya Kikwete (JKCI) Michael Lazaro akimpima shinikizo la damu mwananchi aliyetembelea banda la JKCI – Hospitali ya Rufaa ya Kanda Chato Kliniki ya moyo leo wakati wa maonesho ya 7 ya Teknolojia ya Madini yanayofanyika katika viwanja vya bombambili Mkoani Geita.

Afisa Utafiti na Mafunzo wa Taasisi ya Moyo Jakaya Kikwete (JKCI) Makrina Komba akimpima urefu na uzito mwananchi aliyetembelea banda la Taasisi ya Moyo Jakaya Kikwete – Hospitali ya Rufaa ya Kanda Chato Kliniki ya Moyo wakati wa maonesho ya 7 ya Teknolojia ya Madini yanayofanyika katika viwanja vya bombambili Mkoani Geita.

Na: JKCI

********************************************************************************************************************

Taasisi ya Moyo Jakaya Kikwete – Hospitali ya Rufaa Kanda ya Chato kliniki ya moyo kutumia mashine za kisasa zenye uwezo wa kuchunguza magonjwa yote ya moyo kwa asilimia 95 wakati wa maonesho ya 7 ya teknolojia ya madini yanayofanyika katika viwanja vya Bombambili vilivyopo mjini Geita.

Uchunguzi huo unafanywa na wataalamu wa Taasisi ya Moyo Jakaya Kikwete (JKCI) kwa kushirikiana na wenzao wa Hospitali ya Rufaa ya Kanda Chato (CZRRH) ikiwa ni muendelezo ya kuboresha kliniki ya matibabu ya moyo katika mkoa wa Geita.

Akizungumza na waandishi wa habari leo mjini Geita Daktari bingwa wa moyo wa Taasisi ya Moyo Jakaya Kikwete (JKCI) Salehe Mwinchete alisema JKCI inafanya huduma za uchunguzi wa magonjwa ya moyo katika mikoa ya pembezoni mwa Tanzania kuwasogezea huduma wananchi wa Tanzania na nchi za jirani kwani Tanzania ni nchi iliyopewa jukumu la kutoa huduma za kibingwa za matibabu ya moyo Afrika Mashariki na kati.

Dkt. Salehe alisema katika maonesho hayo asilimia kubwa ya watu waliofika katika banda la JKCI wana maradhi ya moyo katika hatua mbalimbali yakiongoza matatizo la shinikizo la juu la damu.

“Watu tunaowaona katika banda letu wapo ambao wana matatizo ya shinikizo la juu la damu bila ya wao kujua lakini wengine wana matatizo hayo na wameacha kutumia dawa kwa sababu mbalimbali”,

“Wito wetu kwa jamii pale wanapogundulika kuwa na magonjwa ya moyo wafuate ushauri wa wataalamu wa afya wa kutumia dawa na kuudhuruia kliniki kwani magonjwa ya moyo ni chanzo cha vifo vya umri mdogo ambavyo utokea kwa watu wenye umri kati ya miaka 30 hadi 70”, alisema Dkt. Salehe

Kwa upande wake Daktari kutoka Hospitali ya Rufaa ya Kanda Chato (CZRRH) Liberius Libent alisema ushirikiano kati ya JKCI na CZRRH ulianza mwaka 2022 lengo likiwa kuikuza, kuilea na kuiongezea uwezo Hospitali ya Rufaa ya Kanda Chato katika kutoa huduma za uchunguzi na matibabu bobezi ya moyo.

Dkt. Liberius alisema ushirikiano huo umeiwezesha hosptilia ya Kufaa ya Kanda Chato kutoa huduma za upasuaji wa mishipa ya damu ambapo hadi sasa wameweza kuwafanyia upasuaji huo wagonjwa wanne.

“Kupitia kliniki yetu hii ya moyo kila mwezi wataalamu wa JKCI wanafika CZRRH kuhudumia wagonjwa wa moyo na kupunguza rufaa za wagonjwa kufuata huduma mbali na mahali wanapoishi”, alisema Dkt. Liberius

Naye mwananchi aliyepatiwa huduma katika banda la JKCI Robert Nangu ameipongeza JKCI na CZRRH kwa kutoa huduma za uchunguzi wa magonjwa ya moyo kwa wananchi kwani huduma hizo upatikana kwa nadra.

“Watanzania wengi tunasumbuliwa na maradhi ya moyo ambayo mara nyingi upelekea kupoteza maisha bila kujua, tukipata nafasi kama hii ya kufikiwa na huduma hizi tusijiulize mara mbili tujitokeze kupima afya zetu”, alisema Robert

Robert alisema Serikali imeona tatizo la maradhi ya moyo linaongezeka kwa kasi hivyo kuwekeza katika matibabu ya magonjwa hayo na kuwafikia wananchi mara kwa mara.