JKCI yapongezwa kuwafanyia vipimo vya moyo wachimbaji wa madini

Afisa Muuguzi wa Taasisi ya Moyo Jakaya Kikwete (JKCI) Samweli Mpiga akimpima kipimo chakuangalia mfumo wa umeme wa moyo (Electrocardiography – ECG) mwananchi aliyefika katika banda la JKCI – Hospitali ya Rufaa ya Kanda Chato kliniki ya moyo wakati wa maonesho ya 7 ya teknolojia ya madini yaliyomalizika leo mkoani Geita.

Daktari wa Hospitali ya Rufaa ya Kanda Chato (CZRRH) Liberius Libent akimpima kipimo cha kuangalia jinsi moyo unavyofanya kazi (Echocardiography – ECHO) mwananchi aliyefika katika banda la JKCI – Hospitali ya Rufaa ya Kanda Chato kliniki ya moyo wakati wa maonesho ya 7 ya teknolojia ya madini yaliyomalizika leo mkoani Geita.

Na: JKCI

*********************************************************************************************************************

Rais wa Jamhuri ya Muungano Tanzania Mhe. Dkt. Samia Suluhu Hassan ameipongeza Taasisi ya Moyo Jakaya Kikwete (JKCI) kwa kutoa huduma za upimaji wa magonjwa ya moyo pamoja na elimu ya kujikinga na magonjwa hayo kwa wachimbaji wa madini wakati wa maonesho ya 7 ya teknolojia ya madini.

Pongezi hizo amezitoa leo wakati akifunga maonesho hayo yaliyokuwa yakifanyika katika viwanja vya Bombambili na kumalizika leo mkoani Geita.

Mhe. Dkt. Samia alisema kutoa huduma za uchunguzi wa magonjwa ya moyo kwa wachimbaji wa madini kunawasaidia kujikinga na magonjwa hayo na kuweza kujenga taifa lenye nguvu na afya bora.

Akitoa taarifa ya upimaji uliofanyika katika banda la JKCI – Hospitali ya Rufaa ya Kanda Chato kliniki ya moyo Daktari bingwa wa magonjwa ya moyo wa JKCI Dkt. Salehe Mwinchete alisema watu 856 wamefanyiwa uchunguzi na matibabu ya magonjwa ya moyo.

Dkt. Salehe alisema upimaji huo umefanyika pia kwa watoto 41 waliokuwa na dalili mbalimbali zilizohusishwa na dalili za magonjwa ya moyo ikiwemo kushindwa kupumua vizuri, kuchoka, kuwa na maumivu ya kifua pamoja na tatizo la mapigo ya moyo kwenda kasi.

“Katika upimaji huu wanaume 399 sawa na asilimia 47 na wanawake 457 sawa na asilimia 53, wote hawa tuliwapatia huduma pamoja na elimu ya namna ya kujikinga na magonjwa yasiyoambukiza yakiwemo ya moyo”, alisema Dkt. Salehe

Dkt. Salehe alisema watu 631 walifanyiwa kipimo cha kuangalia jinsi moyo unavyofanya kazi (Echocardiography – ECHO) na watu 612 walifanyiwa kipimo cha kuangalia mfumo wa umeme wa moyo (Electrocardiography – ECG).

“Tumetoa rufaa kwa watu wazima 235 ambapo kati yao watu 182 wanatakiwa kwenda Hospitali ya Rufaa ya Kanda Chato na watu 42 Kwenda JKCI kwaajili ya kufanyiwa vipimo vingine vya moyo pamoja na matibabu. Pia tumetoa rufaa 11 za watoto wanaotakiwa kufika JKCI kwaajili ya matibabu na wengine kwaajili ya kufanyiwa upasuaji wa moyo”, alisema Dkt. Salehe

Dkt. Salehe alisema watu waliofanyiwa vipimo katika banda la JKCI wengi wao wamekutwa na tatizo la shinikizo la juu la damu, huku wengine wakiwa na matatizo ya sukari kwenye damu, moyo kutanuka, matatizo ya mfumo wa umeme wa moyo, tatizo la shinikizo la juu la damu kwenye mapafu, matatizo ya moyo kushindwa kufanya kazi, na magonjwa ya moyo ya kuzaliwa nayo kwa watoto.

Wakizungumza kwa nyakati tofauti wananchi waliofanyiwa uchunguzi katika banda la JKCI Hospitali ya Rufaa ya Kanda Chato kliniki ya moyo wameishukuru Serikali kwa kuwekeza katika utoaji wa huduma za matibabu ya moyo nchini.

Mathayo Martine alisema ikiwezekana huduma za uchunguzi wa magonjwa ya moyo zinazofanywa na JKCI zisiishie katika maonesho hayo bali ziendelee kutolewa mara kwa mara kwani uhitaji wa huduma hizo ni mkubwa.

Mathayo alisema watu wengi wanaoishi maeneo ya vijijini huduma za uchunguzi wa magonjwa makubwa ikiwemo magonjwa ya moyo haziwafikii hivyo kuwaomba wataalamu wa JKCI kufikisha huduma hizo maeneo ya mijini na vijijini.

“Tunawaomba ikiwapendeza huduma hizi muendelee kuzitoa kwetu hata baada ya maonesho haya, wengine hatukutarajia kama ipo siku tungepata huduma hizi kirahisi hivi lakini bado ipo jamii ambayo inahitaji kufikiwa msiiache”, alisema Mathayo

Katika maonesho hayo JKCI – Hospitali ya Rufaa ya Kanda Chato kliniki ya moyo imeibuka mshindi wa kwanza kati ya taasisi zinazotoa huduma za afya kutokana na umahiri na ubobezi wa wataalamu waliokuwa wakitoa huduma.