Wafanyakazi wa JKCI watakiwa kujiandikisha katika daftari la wapiga kura wa serikali za mitaa

Kaimu Mkurugenzi Mtendaji wa  Taasisi ya Moyo Jakaya Kikwete (JKCI) Dkt. Angela Muhozya akizungumza na wafanyakazi wa taasisi hiyo  umuhimu wa kujiandikisha katika daftari la wapiga kura wa serikali za mitaa wakati wa kikao cha kupokea ripoti ya tathimini ya mwaka wa pili wa utekelezaji wa mpango mkakati wa taasisi hiyo kilichofanyika leo jijini Dar es Salaam.

Afisa Mipango wa Taasisi ya Moyo Jakaya Kikwete (JKCI) Vida Mushi akitoa ripoti ya tathimini ya mwaka wa pili wa utekelezaji wa mpango mkakati wa JKCI  kwa wafanyakazi wa taasisi hiyo leo jijini Dar es Salaam.

Daktari bingwa wa magonjwa ya moyo wa Taasisi ya Moyo Jakaya Kikwete (JKCI) Yona Gandye akitoa maoni yake wakati wa kikao cha kupokea ripoti ya tathimini ya mwaka wa pili wa utekelezaji wa mpango mkakati wa taasisi hiyo kilichofanyika leo jijini Dar es Salaam.

Mkurugenzi wa Utawala na Rasilimali Watu wa Taasisi ya Moyo Jakaya Kikwete (JKCI) Ghati Chacha akiwakumbusha wafanyakazi wa taasisi hiyo kujaza taarifa zao za kazi wanazozifanya kila siku katika mfumo wa kupima utendaji wa kazi za watumishi wa umma (PEPMIS) wakati wa kikao cha kupokea ripoti ya tathimini ya mwaka wa pili wa utekelezaji wa mpango mkakati wa JKCI  kilichofanyika leo jijini Dar es Salaam.

Afisa Uuguzi wa Taasisi ya Moyo Jakaya Kikwete (JKCI) Paul Josephat akiuliza swali a wakati wa kikao cha kupokea ripoti ya tathimini ya mwaka wa pili wa utekelezaji wa mpango mkakati wa JKCI  kilichofanyika leo jijini Dar es Salaam.

Baadhi ya wafanyakazi wa Taasisi ya Moyo Jakaya Kikwete (JKCI) wakifuatilia  ripoti ya tathimini ya mwaka wa pili wa utekelezaji wa mpango mkakati wa JKCI  wakati ikisomwa na Afisa Mipango wa JKCI Vida Mushi kwa wafanyakazi wa taasisi hiyo leo jijini Dar es Salaam.

***********************************************************************************************************************************************************************************************

Wafanyakazi wa Taasisi ya Moyo Jakaya Kikwete (JKCI) wametakiwa kujiandikisha katika daftari la wapiga kura wa serikali za mitaa  ili waweze kushiriki katika uchaguzi wa serikali za mitaa utakaofanyika tarehe 27 Novemba mwaka huu.

Rai hiyo imetolewa leo jijini Dar es Salaam na Kaimu Mkurugenzi Mtendaji wa Taasisi hiyo Dkt. Angela Muhozya wakati akiongeza na wafanyakazi hao katika kikao cha kupokea  ripoti ya tathimini ya mwaka wa pili wa utekelezaji wa mpango mkakati wa taasisi hiyo.

Dkt. Angela alisema ni muhimu kwa wafanyakazi wa taasisi hiyo  wakazitumia tarehe 11-20 za mwezi huu  kwaajili ya kujiandikisha katika daftari hilo ili ifikapo tarehe 27 mwezi Novemba wawe na sifa za kupiga kura na kuwachagua viongozi wa serikali za mitaa.

 “Tunaelekea katika uchaguzi wa  serikali za mitaa ambao umebeba maendeleo ya nchi yetu na yetu binafsi kwa siku za mbeleni, ninawaomba kila mtu katika eneo analoishi aende kujiandikisha ili wakati wa uchaguzi ukifika mkachague viongozi wazuri watakaoshirikiana na wananchi kutuletea maendeleo ya taifa letu”, alisisitiza Dkt. Angela.

Akizungumzia kuhusu utekelezaji wa mpango mkakati huo Dkt. Angela ambaye ni daktari bingwa wa usingizi na wagonjwa mahututi aliwapongeza wafanyakazi hao kwa kujitoa kwao kufanya kazi kwa bidii na kujituma na kuwataka kuongeza jitihada zaidi katika kutoa huduma kwa wananchi.

“Mpango mkakati wetu  unaisha mwaka 2025/26 huku ukiwa na maadili ya msingi ya ushirikiano, uadilifu, weledi na ubunifu ninaamini kila mmoja wetu akiyatekeleza haya  tutatimiza malengo yetu ya kutoa huduma za moyo zenye uthibitisho, mafunzo na utafiti”, alisema Dkt. Angela.

Akiwasilisha ripoti ya tathimini ya mwaka wa pili wa utekelezaji wa mpango mkakati wa taasisi hiyo Afisa  Mipango wa JKCI Vida Mushi alisema walipima kwa kuangalia malengo waliyojiwekea yamefanikiwa kwa kiasi gani, uelewa wa wafanyakazi katika mpango mkakati huo na changamoto zilizopo katika utekelezaji.

“Baada ya kuangalia vipimo tulivyojiwekea tuligundua mpango mkakati wetu kwa mwaka 2024 umefanikiwa kwa asilimia 80 ukilinganisha na mwaka jana ulifanikiwa kwa asilimia 73, ninaamini tukifanya jitihada zaidi tutafikia asilimia 100 katika utekelezaji”.

“Ninawaomba wafanyakazi wenzangu tufanye kazi zetu  kwa kufuata malengo ya taasisi ili kuiwezesha taasisi yetu kufika dira yake ya kuwa taasisi inayotambulika kimataifa katika kutoa huduma, mafunzo na kufanya utafiti wa magonjwa ya moyo”, alisema Vida.

Kwa upande wake Mkurugenzi wa Utawala na Rasilimali Watu wa Taasisi ya Moyo Jakaya Kikwete (JKCI) Ghati Chacha aliwakumbusha wafanyakazi hao kujaza taarifa zao za kazi wanazozifanya kila siku katika mfumo wa kupima utendaji kazi za watumisi wa umma (PEPMIS) kwa wakati kuliko kusubiri wakati mwaka wa fedha unaisha.

“Majukumu yenu ya kazi mnazozifanya kila siku yako katika mpango mkakati wa taasisi ni muhimu kila wiki mkajaza kazi mlizozifanya kwa wiki husika kwa kufanya hivyo kutawasaidia kupata alama nzuri za utendaji  wa kazi na kuepukana na mzigo wa kujaza kazi za mwaka mzima mwishoni wa mwaka wa fedha”, alisema Ghati.